கடவுள் ஒரு.................. கவிதை

                 கடவுள் ஒரு....

·     

           கடவுள் ஒரு வள்ளல்

ஆதியிலே

இவ்வுலகைப் படைத்தவன்

கூடவே மனிதர்களையும்

படைத்த பொழுது..

·        கடவுள் ஓர் அறிஞன்

குட்டை, நெட்டையென்று

சோடி சேர்த்து

சோதனைச் சாவடிகளில்

வாழ்க்கையென

ஒன்றை

உணர்த்திய பொழுது..

·        கடவுள் ஒரு புரோகிதன்

சேரவேண்டியதைப்

பிரித்து,

சேரக்கூடாததை

இணைத்து

இதுதான் வாழ்க்கையென்று

ஒரே மந்திரத்தை

உச்சரித்த பொழுது...

·        கடவுள் ஒரு வேடிக்கையாளன்

விரல்களை இழந்தவன்

கட்டுக் கட்டாய்

சலவைசெய்த

பாவ நோட்டுக்களை

வரதட்சணையாகப்

பெற்ற பொழுது.....

·        கடவுள் ஒரு சூத்திரதாரி

அவரவர் அர்த்தப்படுத்திய

வாழ்க்கையை

அகராதியில் தேடியும்

கிடைக்காத பொழுது

கிடைத்த அர்த்தங்களே

அவரவர் வாழ்க்கையென

படிப்பித்தபொழுது.....

·        கடவுள் ஒரு  நீதிமான்

அவரவர் விருப்ப

உணவுகளை

ஒரே பானையில்

தேடிய பொழுது

ஒரு பானை சமைத்ததே

உங்களுக்கான உணவென்று

உரைத்தபொழுது....

·        கடவுள் ஒரு கஞ்சன்

தேடலை அறிவாக்கி

திட்டமிட்டதை

அடையுமுன்னே

வாழ் நாள் முடிந்ததென்று

முடித்து வைத்த பொழுது....